聲做伙聽 路做伙行

Siann tsò-hué thiann, lōo tsò-hué kiânn.

Our Voices, Our Journey

臺灣同志遊行咧欲第 24 屆矣，同志婚姻專法嘛已經通過 7 年。望向現此時 ê 臺灣性別運動發展，咱面對 ê 是政治極化所致 ê 激烈衝突。川普當選所湧來 ê 國際反 DEI 潮流（多元、平等、共融，Diversity, Equity, Inclusion），已經成做具體 ê 反 LGBT+ 勢力，共各種性別平權 ê 成果攏淹淹落。

佇亞洲國家當中，韓國 ê「首爾酷兒文化節」已經有四擺予人禁止佇首爾廣場舉辦。2026 年 6 月佇其他所在舉辦 ê 時陣，700 公尺外就是反對團體 ê 遊行集會，內面嘛有少年人用唱歌跳舞來表達反對，看起來和支持民眾 ê 氣勢是無輸贏¹。仝款佇 2026 年 6 月，中國 ê 同性交友軟體²（blued）予監管部門要求袂當出現虹 ê 元素，嘛袂當顯示任何代表身份抑是性角色 ê 標仔（1 / 0 / side）。會當看著講，無論是民主抑是獨裁國家，反對 LGBT+ ê 人士攏會直直走揣和政府同盟 ê 機會、LGBT+ 社群 ê 權益攏會受著國家層級 ê 打壓。

行政院 2026 年 ê 性平民調³顯示，民眾對「同性伴侶應該享有合法結婚權利」ê 同意比例比舊年較低 6.3%，民調內對迒性別 ê 態度嘛較保守，同意「免術換證⁴」ê 比例，閣對 40.7% 降到 26.8%。部分研究⁵嘛顯示，臺灣同志婚姻 ê 法制化，並無共媒體對 LGBT+ 社群 ê 報導變做閣較正面。2025 年臺灣同志遊行 ê 爭議⁶，閣較顯示 LGBT+ ê 權益佇臺灣隨時有可能倒退行。就若 2025 年臺灣同志遊行 ê 主題「超．連結」想欲表達 ê，網路頂懸仝溫層極化，加深逐家互相誤解，愛迒過標仔，才有法度互相理解咱無仝款 ê 所在。但是欲按怎才會使迒過標仔？今年阮認為愛對「傾聽」開始。

換位，才有法度真正聽著人的心聲

巴別塔⁷ ê 故事內底，分化 ê 語言造成人類 ê 溝通困難，所擺限制人類 ê 驕傲發展。社會內底無仝 ê 語言、國家、階級、性別、文化、宗教 ê 界限，予咱真僫明白別人 ê 性命處境，久來就形成偏見佮驚惶。譬論講女性因為對性暴力 ê 驚畏，造成較僫同理迒性別使用便所 ê 情境，閣進一步致使溝通 ê 困境和誤解。譬論講臺灣人對外籍移工 ê 生份，造成各種差別待遇⁸。閣有臺中警察對同志生活空間 ê 雙重標準⁹。這寡代誌攏顯示無仝族群之間聽見、理解心聲 ê 困難。

臺灣做一个移民社會，多語言 ê 生活場面是機會嘛是挑戰。佇多語言 ê 族群組成當中，蹛臺灣這塊土地過日 ê 人對無仝文化有一種包容性，毋過這款 ê 包容性，佇社群媒體所形成 ê 仝溫層內底，嘛漸漸仔欠缺。欲按怎迒過仝溫層、真正聽著別人 ê 聲音，嘛變做當代臺灣人需要重新練習 ê 能力。臺灣同志遊行一直為性多樣社群弓出其中一个平等交流 ê 實體空間，予臺灣 ê 性多樣社群佇 365 工當中有一工，會當毋驚神、毋驚鬼，行佇街仔頭，共多元 ê 聲音傳達予社會。但是這款 ê 平等空間佮發聲管道嘛毋是千萬年攏袂變 ê。這久國際 DEI 漸漸稀微，咱會當看著濟濟價值攏予人重新檢驗。若欲維持這款平等 ê 空間，嘛需要理念相 siāng ê 人繼續支持，才會用得繼續向前行。

自女權火照夜路到同志遊行，咱攏行佇咧仝一條路裡

有 sia̋n-pái ê 造橋鋪路，才有今仔日 ê 同志遊行。民主社會 ê 性別運動來自濟濟 sia̋n-pái ê 粒積，一直調整方向、推廣支持，咱才會當繼續向前行。30 年前 ê「女權火照夜路」講出：對安全空間 ê 追求，無應該是限制特定性別使用，應該愛看著結構當中 ê 無平等；閣延伸出「同志愛日行權」ê 口號，成為臺灣上早期 ê 同志上街頭遊行。同志遊行自過去就佮性別平權是連相倚的，追求自在 ê 空間嘛一直是臺灣爭取性別權利 ê 重點。

臺灣同志遊行共彼寡佇社會內孤單 ê 聲音箍做伙，予主流排斥 ê 少數佇遮會當坐相倚，得著溫暖、得著力量，多元 ê 聲音嘛會當佇臺灣 ê 街頭出聲；臺灣同志遊行嘛是弱弱相伨 ê 實行，予性多樣社群會使和其他弱勢社群互相扶持，障礙者、原住民、移工、禁羈實踐者、新住民攏 bat 徛佇同志遊行 ê 舞台頂。阮相信多元並毋是拖累進步 ê 咒讖，是予咱佇民主社會學會曉聽、揣共識；多元是一款約束，是欲陪行上慢的人做伙行。

臺灣同志遊行成做民主社會當中 ê 性別行動，需要直直傾聽、對話，予少數人 ê 想法佇溝通交流當中成做社會 ê 共識，來改變社會。毋過仝時咱嘛需要了解著，民主社會保障 ê 自由發聲空間，毋是理所當然一直攏佇遐，甚至民主社會本身，嘛可能搪著危機。守護民主自由 ê 生活方式，就是咧守護多元聲音 ê 塗肉，嘛是守護性別平等權利 ê 必要條件；無仝語言、無仝處境 ê 人佇傾聽和對話之間得著共識，嘛會當予民主社會內性別行動 ê 跤步閣較在、想法閣較開闊。性別平權佇民主社會內 ê 繼續實踐，嘛已經是臺灣自內到外，對抗父權、威權脹大 ê 力量來源。

面對反對 DEI ê 浪潮，性別平等是若無進就會退；徛佇世界 ê 十字路口，臺灣已經行出特別 ê 性平之路。

聲做伙聽，路做伙行。若是你嘛聽著矣，就佮阮上街頭，做伙來行。

註1：https://www.instagram.com/reel/DZhWgK-KWu2/
註2：https://www.instagram.com/p/DY7xzbcPlIW/
註3：https://gec.ey.gov.tw/File/F060BC051DD56E07/9ad6e703-9dc2-4eea-aa78-ddf9de993c44?A=C
註4：對「跨性別者可以不用摘除性器官，就能更換身分證上的性別」這句講法同意 ê 比例
註5：Chen, J. H., & Lu, H. C. (2026). Evolving Landscapes, Shifting Narratives: Understanding Taiwanese News Media Portrayals of LGBTQ+ Populations from 2010 to 2021. Journal of Homosexuality, 1–29. https://doi.org/10.1080/00918369.2026.2690193
註6：https://theinitium.com/20251024-whatsnew-taiwan-23rd-lgbt-pride-controversy/
註7：巴別塔（Tower of Babel）ê 典故，詳見《聖經．創世記》第11章1到9節。佇這个典故當中，人類因拍算欲起通天高塔來放送家己的名聲，上帝決定擾亂人類的共通語言閣共人類分散去四界。佇當代人文和社會科學論述當中，這个典故已經轉譯做一種文化符碼，用來隱喻無仝群體因語言、文化抑是性命經驗 ê 分化，致使溝通阻礙、傲慢、同理心欠缺，閣有偏見佮社會隔閡。
註8：遮所指稱 ê「生份」佮「差別待遇」，佇移民社會學，定定予人概念化做「邊界工課（boundary work）」。台灣人佇心理、空間和法律起一堵牆，予移工佇體制內自頭到尾攏牢佇「客體化」和「邊緣化」ê 處境，真僫建立平等 ê 迒群體溝通。詳細論述參見藍佩嘉，《跨國灰姑娘：當代華人社會的幫傭、雇主與全球代間契約》（台北：群學，2008）。另外，關於臺灣社會佇日常空間（譬論臺北車頭大廳禁坐爭議、移工宿舍限制等）對移工展現 ê 排外和雙重標準，嘛會當參見台灣國際勞工協會（TIWA）逐年關於移工勞動人權和社會歧視 ê 倡議報告。
註9：臺中執法機關對同志社交空間 ê 歧視佮雙重標準，講 ê 是 2026 年 1 月臺中市政府警察局第六分局查緝西屯逢甲商圈一間同志生活會館（Body Fresh）ê 爭議。佇案中，警方高調放送「男警犧牲色相」、「難上加男」等新聞宣傳，閣主動漏洩偵查詳細、引導社會討論，予社團法人台灣基地協會、台灣同志諮詢熱線協會、民間司法改革基金會等 8 个民間團體聯合譴責，批評其執法欠缺性別敏感度、違反偵查不公開原則，閣用空泛 ê 道德名義對性少數社群 ê 隱私空間進行制度性打壓和公審。相關聲明和評論參見台灣同志諮詢熱線協會（2026）〈譴責臺中市政府警察局違反偵查不公開原則及欠缺多元性別敏感度〉公開聲明稿，閣有公民行動影音紀錄資料庫（2026）〈抗議行政權淪為歧視工具：聲援Body Fresh生活會館〉新聞稿。